Krismesverrassing

Heem gekoame van sjoeël, wis ich neet wat mich uëverkoam.....
Óngerwiel de mam noa de sjtad woar um ’t zoeëvöalste aasjleepwerk
te doeë vuur de Krismes, houw d’r pap d’r ee haof ATV’tje teëgenaa
gewórpe um ós te verrasse: heë woar d’r boom en de krib ’nt ópzette.......

Ich zoog ’t al dierek...heë bedoelde ’t good, mè ’t woar in éé woad: kappes!
Wat zouwe mam en ich verras zieë en dat woar och zoeë: knudde.
Foei foei foei wat ee gehóddel ! De lempkes in d’r boom branke,
mè doa woar och alles mit gezag.
Ging fetsuunlige verdeling, sjots en sjeef as of heë ze zoeë mar drin
houw gesjmieëte.
D’r boom idem dito, óch sjots en sjeef. Neet te geleuve, gee gezich.
Wie woar dat te rijme mit anger joare wie v’r mit de ganse siepsjaf
óp d’r maat zoeëget alle beum in de heng houwe gehad vúúr dat d’r pap
endlig inne houw deë heë good genóg vóng....En noe dizze sjeve sjrankel
hat heë zich in de heng loate duje. Foei foei foei!

Zónger de mam is d’r pap nurges. Heë hat de balle versjtank va krisböl
en ’t ingelehoar liek mieë óp ’ne haof oeteree gerieëte knot witte wol.
Foei foei foei !
En woeë is ’t ege geheëkelde ingelke van de mam geblieëve ?
Achter in d’r boom woeë ginne hónk ’t kós zieë hange !
’t Eekketske dat heë óp de hobby-sjoeël zelf houw gemak, dat hóng vure aa
óp de blink. Wie heë zich vuursjtelt wie de klinge van hei neëve an de
klöksjkes kinne kómme, is mich óch ee roadsel.

Noe pas zieën ich de krib....neet te filme! Wie ónwies sjtóm. Ee zootje
verfroemeld papier mós rotse vuursjtelle...Rotse die vanoet ’t nieks
begóste zoeëget 30 sentemeter van gen eëd en dróngeroet sjtoke de sjmaal
koeëpere puëtjes van ’t beizettöafelke....Kan ‘t nog viezer?
’T roeëd lempke in ’t sjtelke kan ich nog goodkure, mè zoeë vlak boave de
aagekleëfde naas van d’r Joeësef ? Mót dat zoeë ópzichtig in ‘t oog valle?
’t Liek wal ee soat bruikas-effek in d’r ieskouwe sjtal.

Uëver d’r éé-ermige herder hat ’e noagedach, mè doa sjteet teëgenuëver dat
’t groeëtste deel van ‘t anger gezelsjap mit d’r ruk noa de kamer sjteet.
Foei foei foei! En neet ins ee paar dennetek vuur d’r radiator gezat, ojee neë.
De dreikuëninge sjtónt regelrech vuur de thermostaatverwerming te koekeloere.
’t Mos zoeë ”natuurlik” meugelik tusje de figure gesjtruid. Good bedoeld,
mè ’t is nieks en ’t sjpegelke as drinkplaatsj vuur de dere lik óch nog vol
d’r mit.
Sorry pap, óch bereëkende ónversjilligheed mót gekind zieë.

Neë d’r pap kin kinne wat ’e kint, mè dit kint ’e nit. Foei foei foei!
Boete ’t Jeseke sjteet al mar get plómpverloare erum. De mam hat ee vöal
beëter geveul vuur zoeëget.
Juus wie ich an höar dink, doa kump de mam...de doeëdvermuidheed is höar
aa te zieë.
Ofsjoeën ’t pas veer oer is, hingt höar kapsel óp haof elf. Aafgetoaperd
sjteet ze mit tesje en tuute in de heng, kiekt de kamer in en.... bliet
sjtok sjtief sjtoa.
”Foei foei foei.......... wat bin ich mui” zeët ze flot drachter aa um
d’r pap neet teleur te sjtelle. Mè höar blikke sjpreëke vuur zich.....
Later hat ze ee en anger sjtiekem verplaatsjt en verhange went d’r pap
effe neet in de kamer woar. Mè ’t eekketske leet ze vanaaf zieng prominente
plaatsj de kamer in sjtare:
”want ’t geet um d’r gouwe wil mit Krismes” zag de mam.